Det var duka for ein nervepirrande kamp då Øystese møtte Arna-Bjørnar på Øystese stadion laurdag. Dei to laga har markert seg som dei klart beste i sin avdeling i 4. divisjon, og berre to poeng skilde dei då dei skulle møtast til seriefinalen. Siger ville bety opprykk. For Øystese heldt det med uavgjort. Arna-Bjørnar skårar først, om lag 25 minutt inn i kampen, og skapar enno meir spenning. Øystese set to ballar i nettet, men dommaren roper offside i begge tilfella. Heilt på tampen av første omgang kjem utlikninga. Øystese set ballen i stonga, og Knut Eriksen Eide skyt ballen i nettet på returen. Publikum – det vil seia dei som ikkje har teke turen frå Bergen for å støtta Arna-Bjørnar – er i ekstase. Kampen er jamn, og temperaturen tidvis høg. Gule kort vert delte ut i begge retningar. Spelarar hinkar av bana. Ingen fleire mål vert skåra i andre omgang. Øystese set ballen i nettet, men det er nok ein offside. Når dommaren endeleg blæs i fløyta, er det avgjort: Øystese skal spela i 3. divisjon til neste år, mot lag som Fyllingsdalen, Førde, Brann 2 og Stord. 1–1 var nok.
– Skal bita frå oss i 3. divisjon
– Det smakar fantastisk godt, seier kaptein Sebastian Skåre Tune etter kampen. – Dette er ein kamp eg peika meg ut tidleg i sesongen og skjøna kunne bety mykje, viss me gjorde ting riktig gjennom sesongen. Og det gjorde me. Me har førebudd oss godt. Kampen har nok lege i bakhovudet hos mange, men me har teke ein kamp om gongen. – Korleis vert det å spela i 3. divisjon? – Det vert spanande, men kvaliteten i laget er meir enn god nok. Me skal nok klara å bita godt frå oss der òg. Han seier kampen mot Arna-Bjørnar var rotete og prega av høge ballar og duellar. – Det var ein typisk krigarkamp, ein opprykksfinale med høge skuldrer. Me prøvde å spela litt ball i første omgang, men lukkast ikkje heilt. Så fekk me eit mål før pause – det var veldig viktig. Andre omgang var fullstendig rotete. Då handla det om å gjera jobben. Eg synest me gjorde det godt, og keeperen gjorde ein svært god jobb på slutten. – De fekk motstand frå Arna-Bjørnar? – Ja, det er eit veldig godt lag. Me er dei to desidert beste laga, og begge kunne sikkert spelt ha i 3. divisjon. Men me var gode nok til å ta dei.
Artikkelen held fram under annonsen.
Hjartet i halsen
Også trenar Christian Kjosås er ein lukkeleg mann etter kampen. – Det er fantastisk. Eg har aldri vore med på opprykk i Noreg. – Har du nokon gong vore så glad for uavgjort? – Nei, faktisk ikkje! Eg har nesten ikkje stemme igjen. Han seier han hadde hjartet i halsen siste halvtimen. – Eg synest me var veldig gode. Det var ikkje den finaste fotballkampen me har spelt i år, men me tok eitt poeng, og det var nok. – Tre mål annullerte på grunn av offside – korleis kjentest det? – Det var bale, men me stod saman og fekk eit mål, trass i to skuffelsar i første omgang. – Kva tenker du om å spela i 3. divisjon no? – Me må få landa denne først. Me skal nyta augneblinken og ikkje tenka på det enno. – Er du spent? – Nei. Eg synest me har gjort det bra i heile år, og at me fortener plassen. Folk er glade, så me skal feira godt i kveld. Sjå laget jubla på video på facebooksida til HF.