Hardangerbadet kjem ut av pengeskapet
Hardangerbadet AS ynskjer at Kvam herad bryt den politisk vedtekne bidragsgrensa med om lag seks millionar kroner.
Som HF har skrive før, manglar enno kring elleve millionar kroner til den offentlege delen av bade- og helseanlegget Hardangerbadet i Øystese. Kostnaden med denne delen er 99 millionar kroner. Den private delen skal kosta 128 millionar.
Bed om meir stønad
Førre veke sende Hardangerbadet AS ein del av dokumentasjonen rådmannen treng for å leggja saka fram for ny politisk handsaming. I oversendingsbrevet heiter det at selskapet arbeider med å skaffa fem av dei manglande millionane.
– Etter dette vil det vera ei attståande finansiering for Kvam herad på seks millionar, skriv selskapet.
For å handsama saka, treng rådmannen mellom anna underskotsgarantiavtalane for å kredittvurdera dei. I tillegg har han bede om å få leigeavtalane som sikrar Hardangerbadet AS inntekter nok til å gjera opp for leige av den kommunale delen av anlegget. Dagleg leiar Martin Vik lovar å ettersenda dokumentasjonen. Fristen for å skriva politiske saker til komande møtebolk var 13. oktober. I går hadde rådmannen enno ikkje motteke det som manglar.
Artikkelen held fram under annonsen.
Har fått tal å granska
Vik sende førre veke driftsbudsjett og oversyn over kontantstraumen mellom selskapa.
Rådmannen opplyste nyleg at han arbeider på spreng med saka for å få avklara mellom anna det innkjøpsjuridiske, moms, spelepengar og kontrakttilhøve. Dessutan skal han gå gjennom og kvalitetssikra det økonomiske opplegget.
– Det er opplagt dette som er det mest vesentlege når saka skal opp att politisk. Det er for tidleg å seia noko om når saka er ferdig handsama, men det står i alle fall ikkje på arbeidsinnsatsen, opplyste rådmannen sist veke.
Håpar det går
Dagleg leiar Torleiv Ljones i Kvam næringsråd tok nyleg til orde for at Kvam herad bør dekkja det som manglar for å få bade- og helseanlegget finansiert.
Ordførar Jostein Ljones (Sp) opplyser at det er vanskeleg for han å ta stilling til ei eventuell tilleggsløyving før tilrådinga frå rådmannen er klar. Han meiner prosjektet er godt gjennomarbeidd og at risikoen for ein sprekk i sjølve byggjeprosjektet er minimalisert gjennom ein makspris frå LAB entreprenør AS på 166 millionar kroner, utan moms.
– Eg håpar at det lèt seg gjera å få i gang prosjektet, som vil vera ei stor og viktig næringssatsing i Kvam med regional verknad, uttalar Ljones.
