Publisert 07. oktober 2017 kl. 00.08. Oppdatert 07. oktober 2017 kl. 08.19.

To ungdomar alvorleg skadde i ulukke i Kvam


To unge menn er alvorleg skadde etter ei trafikkulukke i Norheimsund fredag kveld.

Tre i bilen

Politiet melde fyrst at berre éin såg ut til å vera alvorleg skadd, men Haukeland universitetssjukehus opplyste klokka 02.10 i natt at både ein 17 og ein 18 år gamal mann har denne statusen. Ein 19 år gamal mann er lettare skadd.
Ifølgje politifyrstebetjent Svein Valland Laupsa i Kvam og Samnanger lensmannsdistrikt sat tre personar i bilen som vart råka av ulukka om lag klokka 23.30. Ingen andre køyrety skal ha vore innblanda.
Bilen kom frå Steinsdalen mot Norheimsund. Bilen kom ut i terrenget ved fylkesveg 7 på den rette strekkja etter Seland-svingane, og landa til sist på sida delvis i den regnvåte vegbanen.

Sat fastklemd

To av personane i bilen verka fyrst å vera fysisk uskadde, men vart sende til Haukeland universitetssjukehus for kontroll. Det viste seg altså etter kvart at ein av desse var alvorleg skadd.
Den eine av dei unge mennene sat fastklemd i bilvraket og måtte hjelpast ut av brann- og redningstenesta. Han vart frigjord litt før midnatt.
Både politiet, legetenesta, ambulansar og brannvernet rykte ut.