Publisert 28. juli 2017 kl. 11.01.

Er dette trolltunga til Kvam?


Gløym preikestol og trollpikk. I Ålvik finst ei relativt ukjend adrenalinperle.


Emneknaggen #preikestolen har over 104.000 innlegg på Instagram. #Trolltunga har over 63.700 treff. #Trollpikken og #trollpikkenminuttforminutt har til saman over 880 innlegg. Men søker ein på #vikedalsnebbet på den sosiale biletdelingstenesta, er det i skrivande stund berre 12 personar som har delt bilete frå det pittoreske utkikkspunktet i Ålvik.

Synet frå kanten er kanskje ikkje fullt så spektakulært som det ein får 604 meter over Lysefjorden, og eigentleg er panoramautsikta langs vegen opp flottare enn den frå sjølve nebbet. Men det er herleg svimlande å stikka hovudet ut og stira ned i elva som renn langt under deg. Og panoramabilete tek seg ikkje like godt ut i sosiale medium som det å stå i triumferande positur med hendene på hofta, eller å sitta heilt ytst på fjellkanten 757 meter over Hardangerfjorden. Plasserer fotografen seg rett, kan ein dessutan unngå å få industriområdet i Ålvik sentrum med på det obligatoriske biletet – om det skulle vera eit poeng.

Turen er kanskje ikkje like eggande som den som har teke knekken på tallause turistar som har prøvd å ta seg opp til Trolltunga; han tek knapt ein halvtime frå parkeringsplassen. Men dersom ein, som utsendingane til HF, er litt distré og gløymer at det er bygd ein ny veg, og dermed startar turen fire hundre høgdemeter lågare enn naudsynt, er han likevel tøff nok til å gjera ein tungpusten på toppen, og gi både ei god meistringskjensle når du kjem ned att og gangsperr dagen derpå.


Namnet Vikedalsnebbet er heller ikkje like knis-framkallande og ordspelvenleg som Trollpikken. Men det får heller vera.


– Spektakulært

Bibliotekleiar Ragna Helene Vestrheim er ei av dei som tok turen til nebbet med den gode utsikta nyleg.

– Eg gjekk der med foreldra mine for å få ein fin tur. Det er veldig kjekt at ein kan køyra opp den bratte stiginga, og så gå ein liten tur til den nydelege utsikta. Ho er heilt spektakulær. Me gjekk dit på ein veldig fin og klar dag, så me såg langt både innover og utover fjorden.

– Viss du må samanlikna nebbet med andre turmål på Vestlandet, kva er det første du tenker på?

– Hehe, no vil du vel at eg skal seia Trolltunga? For biletet sin del er det mykje lettare å dra til Ålvik. Eg kjem nok ikkje til å gå til Trolltunga. Men eg trur ikkje turane kan samanliknast utanom biletet.

Vikedalsnebbet er eitt av turmåla til Kvam i kryss og krakje i år, og det var i turlagsbrosjyren i år at namnet dukka opp. Vestrheim er ikkje Kryss og krakje-aktiv, men ho deler ut klippekort på biblioteket og er godt kjend med turmåla.

– Eg les mykje om turane og blir veldig inspirert. Eg har gått nokre av dei, seier ho.


Hipt turmål

Guro Aalvik frå Ålvik fortel at det ikkje var særleg mange besøkjande på Vikedalsnebbet for eit år sidan. Enn så lenge er det ingen kø der.

– Me som veit om staden og har gått på tur forbi der, har jo vore utpå, men det har aldri vore noko veldig med folk der. Det er ikkje noko Trolltunga-nivå. Men kanskje det kan bli det? Det er jo ein mykje lettare tur, seier Aalvik på telefon frå Giljafjell.

I oktober i fjor delte ho eit bilete av nebbet på Facebook. Biletet fekk mykje merksemd, og vart mellom anna delt av ei facebookside for Trolltunga som sjølvaste Fjorden Cowboys-kjendis Joar Førde administrerer.

– Etter det har det komme ein del turgåarar opp der. Det er blitt eit hipt mål, og det er støtt folk der når eg går forbi.

– Tek du æra for det?

– Haha, ja, eg må ta litt av æra. Og så lokkar jo sjølvsagt den Kryss og krakje-posten. Og det har jo komme så fin veg opp der no. Det er kjekt at folk tek turen.

– Kvifor trur du det har vorte eit populært turmål?

– Eg veit ikkje, det er jo mange sånne «nebb» rundt om. Men det er lett tilgjengeleg, og du får fjorden og fjellet og alt på same bilete. Det er jo så hipt med bilete no. Dessutan er det litt skummelt, og ein får litt adrenalin av å gå frampå kanten.


Aalvik seier at ho sjølv ikkje toler å sjå på når folk går heilt ut på kanten.

– Og ungane mine får i alle fall ikkje gå der åleine.