Notanes: Kostnadsvekst på 27 prosent

Kostnadsramma for reinseanlegget på Notanes burde ifølgje rådmannen ikkje sprekka med meir enn maksimalt 20 prosent. No varslar han ein auke på 27 prosent.

Rekninga får vass- og avløpsabonnentane i posten i form av høgare gebyr, men fyrst må budsjettjusteringa godkjennast av heradsstyret i ettermiddag.

Den justerte kostnadsramma, som heller ikkje er den endelege, er på 89 millionar kroner. Sluttsummen kan verta både lågare og høgare enn denne summen, varslar rådmannen.

Kryssar grense

Det politiske vedtaket i desember 2015 om å byggja anleget var basert på ei kostnadsramme på 70 millionar kroner. Rådmannen skreiv at uvissa knytt til kostnadsvurderinga ikkje burde vera «større enn +/- 20 %». Dersom kostnaden vert dei varsla 89 millionane, vert grensa kryssa marginalt. Rådmannen skriv ikkje kva følgjer kryssinga vil få.

Han skriv i notatet at dersom politiakrane ikkje vil auka ramma, vil følgjene vera at tilboda må forkastast og ny konkurranse må lysast ut. Det vil føra til kostnadsauke og vesentlege seinkingar, og vil bryta fristen Fylkesmannen har sett for å få reinseanlegget i drift.

– Kostnadene vil fort verta størrre enn innsparinga som eventuelt kan oppnåast gjennom reduserte krav til estetikk for bygg og uteområde, skriv rådmannen.

Seint ute med varsel

Notatet der rådmannen tilrår å auka prosjektramma, vart sendt ut eitt døger før møtet i heradsstyret i dag. Det vart varsla at det ville koma i formannskapsmøtet 12 dagar tidlegare.

I notatet skriv rådmannen at årsaka til at endringa kjem så seint og heller ikkje er del av 1. tertialrapport, er at tingingane knytte til totalentreprisen for bygg og uteområdet framleis pågjekk då tertialrapporten vart skriven. Ein hadde difor ikkje oversyn over kostnadene på det tidspunktet.

Enno er ikkje entreprisen tildelt, men rådmannen meiner å vita meir om kostnaden enn for nokre veker sidan.

Kvam herad har tidlegare inngått kontrakt med Krüger Kaldnes om totalentreprisen for det såkalla prosessutstyret, altså sjølve reinseanlegget. Også denne kostnaden vart større enn venta, mellom anna av di heradet ikkje valde den billegaste leverandøren.

– Dette skuldast at evaluering av pris på dei innkomne tilboda ikkje tok utgangspunkt i den opphavlege investeringskostnaden for kommunen, men kva årleg totalkostnad investeringa vil representera for kommunen inklusiv renter, avdrag og garanterte drifts- og vedlikehaldskostnader, skriv rådmannen.

Skuldar på vedtak og innspel

Han meiner det politiske vedtaket om å leggja vekt på estetikk og miljøomsyn er ei årsak til at det ikkje er råd å seia eksakt kor dyrt prosjektet vert enno. Dei nemnde omsyna er tillagde stor vekt i evalueringa av tilboda, opplyser rådmannen.

Han vedgår også at fleire føresetnader i det politiske vedtaket om å gje grønt lys for prosjektet, er endra. Plasseringa er endra, slik at det gamle reinseanlegget må rivast. Følgjeleg må eit mellombels reinseanlegg nyttast i anleggsperioden. Innspel frå særleg Øystese grendeutval har ført til auka kostnader i form av kravom regulering av området, ifølgje notatet.

Gløymde å retta summen

Som del av tertialrapporten skal heradsstyret drøfta eit anna prosjekt som får ein monaleg rammeauke: vass- og avløpssanering på Norheim i Norheimsund.

Ifølgje rapporten aukar kostnaden til 5,2 millionar kroner. Stabs- og økonomisnjef Anita Hesthamar forklarar at det opphavleg var budsjettert 1,6 millionar kroner til prosjektet, men at tilbodsrunden avdekte ein monaleg kostnadsvekst. Denne har som følgje av ein feil ikkje vorte justert i budsjettet før no.

Ho påpeikar at det er snakk om ein del arbeid som uansett må gjerast. Difor har ikkje administrasjonen lagt stor vekt på å utbrodera sprekken i ei travel tertialtid.

Rekninga også for denne sprekken går til forbrukarane, ettersom vass- og avløpsinvesteringar skal dekkjast med gebyrinntekter.