Børven skåra i cupen

Torgeir Børven frå Øystese skåra det fyrste målet for Brann etter 25 minutt då laget slo Lysekloster ut av cupen onsdag kveld. Brann vann 2–0 i Os. Sivert Heltne Nilsen stod bak den andre skåringa.

Børven-målet var av den enkle sorten. Eit frispark enda med at Azar Karadas la ballen til rette for Børven, som hadde ein lett jobb med å setja han i mål.

Kvemmingen seier til bt.no at han har vanskar med å finna ein god rytme ettersom han ikkje får spela heile kampar jamleg. Berre bortekampen mot Lillestrøm i april spela han frå start til slutt.

– Eg vil helst spela 90 minutt regelmessig. Det kan ikkje gå to veker mellom kvar gong, for då vert det vanskeleg å få flyt, seier han til nettavisa i Bergen.

Han slår fast at kampen om spissplassane er tøff, og at han må gjera det beste ut av situasjonen. Trenar Lars Arne Nilsen slår fast at det er viktig for spissar å skåra mål.

Sundag kveld møter Brann Aalesund på heimebane. Børven kom ikkje på banen i førre seriekamp, då Brann henta att leiinga til Sogndal og vann 3–2 på Fosshaugane laurdag.