Naudetatane fekk mannen på land og utøvde hjarte- og lungeredning.

Mann (63) funnen i sjøen er kritisk skadd

Ein mann på 63 år vart sundag føremiddag funnen medvitslaus i sjøen i Norheimsund.

Mannen vart oppdaga drivande i sjøen av personar som stod på land nær Straumen i sentrum.

Meldinga kom til politiet klokka 10.25.

Kom raskt fram

Politi, legar og brannvesen kom raskt til og fekk mannen på land. Dei starta hjarte- og lungeredning. Etter ei tid vart mannan frakta vidare med ambulansehelikopter til Haukeland universitetssjukehus. NRK Hordaland melder at han skal liggja i respirator. Ifølgje sjukehuset er han kritisk skadd.

Personane som fyrst oppdaga mannen, varsla Stein B. Pedersen ved Straumen senter. Han fortel at mannen viste livsteikn då han vart oppdaga.

Pedersen skunda seg bort til kaien ved Hardanger byggsenter, fann seg ein båt og kom seg ut til mannen, som då låg med andletet ned i vatnet. Han heldt tak i han og skulle til å binda han fast med eit tau, men rakk ikkje gjera meir før brannvernet kom til staden.

Ein brannmann i våtdrakt kom seg i sjøen og fekk kontroll på mannen, som skal ha kome på land klokka 10.43.

Hjarte- og lungeredninga føregjekk deretter ei tid på kaien ved byggsenteret.

Artikkelen held fram under annonsen.

Dramatisk situasjon

Pedersen fortel til HF at det opplevdest dramatisk å hamna i situasjonen, og at han var fullt klar over at kvart sekund kunne telja då han henta båten og kom seg ut til mannen.

Pedersen opna også porten på vegen ned til kaien, slik at naudtetatane fekk tilgang til området.

Ambulansehelikopteret tok mannen med seg frå Norheimsund til Haukeland universitetsjukehus.