Brage vann treningsopphald på Liverpool-akademiet

Brage Tellevik (9) frå Øystese vart valt ut av trenarane på Liverpool fotballskule i Bergen til å få eit treningsopphald på Liverpool-akademiet.

Det står å lesa på nettsida til Øystese fotball. Tellevik deltok på fotballskulen i fjor sommar.

Brage er til vanleg målvakt på gutar 10-laget til Øystese.

”The Liverpool way”

Far Tore A. Tellevik seier til HF at det ikkje nødvendigvis var den beste spelaren som vart vald ut, men ein spelar som spelte ”the Liverpool way”. Det inneber å tora ting på bana og samtidig våga å feila. I tillegg må ein støtta lagkameratane og høyra på trenaren, fortel Tellevik.

Han presiserer at Liverpoolakademiet er ein open fotballskule der kven som helst kan melda seg på. Premien inkluderer berre gratis fotballskule. Reise og opphald må ein betala sjølv.

Ikkje med denne gongen

Det var stort for både Brage og faren at han vann. Båe er Liverpool-fans.

– Eg sa til han då han skulle delta på fotballskulen at det er mange som er med, så han måtte berre gå ut på bana og ha det gøy. Det hjelpte, seier Tellevik.

Han fortel at Brage ikkje ønskjer å reisa aleine på akademiet sidan han ikkje føler seg heilt trygg i engelsk enno. Han kjem difor ikkje til å delta på akademiet denne gongen.

Ifølgje Tellevik kan han vera med sonen til Liverpool, men han får ikkje lov til å vera med inn på sjølve akademiet.

Tur til hausten

Som ein kompensasjon får også faren oppfylt sitt ønske. Det vert familietur for far, mor og dei to minste borna til Liverpool med fotballkamp på programmet til hausten.

Dersom Brage ønskjer det, tenkjer faren å melda han på ein fotballskule på Liverpoolakademiet seinare. Først skal han delta på ein ny Liverpool-fotballskule i Bergen i august.

Dei to favorittspelarane til Brage er ifølgje faren Philippe Coutinho og keeper Simon Mignolet.