Har starta utbyggingsarbeid på Øysteseheimen
Arbeidet er i gang med å byggja seks nye bueiningar på Øysteseheimen. Fuglefjell AS har fått oppdraget, og arbeidet skal vera ferdig til jul, skriv Kvam herad på heimesida.
Kontraktsummen er på kring 10,7 millionar utan moms.
Den gamle troskykkja er demontert og flytta til Storeteigen. Der vil den verta nytta av mellom anna barnehagen.
Også arbeidet innvendig er i gang, og medisinrommet er snart på veg til underetasjen. I det tidlegare fysioterapirommet er det laga to nye kontor, og diverse andre tilpassingar av rom er i gang. Det er i stor grad Hardingar AS og kommunen sine eigne folk som gjer dette arbeidet.
Utandørs vert det graving, fundamentering, arbeid med betongdekke og stålarbeid fram til sommaren.
Anleggsarbeidet vil føra med seg noko støv og støy. Det støyande arbeidet vert utført til tider som er avklarte med dei tilsette ved Øysteseheimen.
På dagtid kan det verta noko press på parkeringsplassar ved Øysteseheimen. Kommunen oppmodar publikum og tilsette om å nytta andre parkeringsplassar i nærområdet.
