Børven skåra to for Brann
Endeleg kom seriemåla i Brann for Torgeir Børven.
Han vart avgjerande då Brann vann vestlandsoppgjeret mot Haugesund i Bergen med 3–1.
Kvemmingen gav heimelaget leiinga etter om lag 17 minutt, då han frå kort hald sett ei pasning frå Daniel Braaten i mål etter litt klabb og babb framføre målet.
– Til og med eg klara ikkje å bomma frå halvannan meter, sa han til Bergens Tidende etter kampen.
Sidan auka Sivert Heltne Nilsen leiinga til 2–0 i 1. omgang, før Haugesund reduserte etter om lag ein time.
Også det andre målet til Børven kom etter forarbeid av Braaten. Kvemmingen sette ballen kontrollert i mål med venstrefoten etter 78 minutt.
– Deilig for meg og laget, sa fotballspelaren frå Øystese, som seier til BT at det tyder mykje for han å endeleg oppfylla draumen om å skåra det fyrste målet for bergensklubben.
Ifølgje bt.no er det 848 dagar sidan førre gong Børven skåra i ein seriekamp.
Brann-trenar Lars Arne Nilsen omtalar kvemmingen som ein lur rev som vann alle duellane mot midtstopparane til gjestene sørfrå.
