Vegen er stengd i Tokagjelet

Fylkesveg 7 er stengd i Tokagjelet etter eit jord- og steinras i natt. Hege Dale og Terje Ljones oppdaga raset.

Dei to var dei to fyrste som kom til staden og varsla frå om hendinga.

Ljones måtte setja att bilen og vart henta av ektefellen, som er dagleg leiar i Hordaland Folkeblad. Ho køyrde frå Norheimsund og parkerte øvst i Snauhaugtunnelen, og nytta høvet til å fotografera rasstaden før ho frakta gubben trygt heim.

Jord, steinar og tre

Vegen er stengd på grunn av ras mellom Snauhaugtunnelen og Hansagjeltunnelen. Jord, stein og tre sperrer vegbana. Det er ikkje meldt om personskadar. Entreprenør Kjosås maskin AS vart kalla ut for å vurdera raset. Dei første bilane kom til rasstaden rett før klokka 00.30 og melde frå til vegvesenet.

– Det har kome nokre store steinar og ein del jord. Det er for tidleg å seia kor lang tid det tek å få rydda opp, seier vaktoperatør Albert Sherington ved Vegtrafikksentralen til Bergens Tidende.

Geologar skal vurdera raset klokka 10, opplyser vegvesenet. NRK Hordaland melder at vegvesenet har trøbbel med ein drone som er naudsynt for å vurdera risikoen for nye ras. Mannskap og utstyr er på plass og klare til å rydda vegen dersom geologen gjev grønt lys, fortel pressekontakt Helge Rong i region vest.

Tilrådde omkøyringsvegar er på fylkesveg 48 og 49, eller via fylkesveg 7, riksveg 13 og europaveg 16. Pendlarar som plar køyra Tokagjelet, bør med andre ord starta tidleg i dag om dei vil vera framme til normal tid.

Vegarbeid i gang

Raset fell saman i tid med ei pågåande rassikring i Tokagjelet som førte til ein del diskusjon i Kvam førre veke. Mellom andre næringslag og næringsrådet hevda at sikringsarbeidet burde venta til etter vinterferien av omsyn til ferierande og kommersielle interesser.

Arbeidet byrja måndag denne veka. Ifølgje pressekontakt Rong er det ikkje på rasstaden det vert utført sikring.

Dei som utfører sikringa, arbeider ikkje fredagar. Dei skulle såleis uansett ikkje i sving i dag.

I 2013 gjekk eit ras som stengde Tokagjelet for all trafikk lenge. Det var eit langt større ras enn dette, men gjekk ikkje langt frå raset i natt. Den gongen målte vegvesenet rasstorleiken i bussar. I natt vart ein ny hjulgåande doning nytta som mål: Nokre av steinane som rasa, var store som trillebårer, melder vegvesenet.