Næringsråd vil ha zipline over Movatnet

Kvam næringsråd vil greia ut moglegheita for å laga ei såkalla zip-line frå Seberg ved Sæleset til Bjørketeigen i Steinsdalen i Norheimsund.

Dagleg leiar i Kvam næringsråd, Torleiv Ljones, seier at han fekk ideen etter å ha prøvd ein tilsvarande ”taubane” i Stoderzinken i Austerrike i sommar. Ei zip-line er ein eller fleire kablar der ein nyttar ei talje til å gli frå startpunkt til endepunkt på kabelen.

Ljones presenterte ideen for næringsrådet. Styret har vedteke å greia ut om det er mogleg å laga zip-lina.

– Me manglar opplevingstilbod til turistane i Kvam. Helst bør det vera noko som utløyser litt adrenalin, seier Ljones.

Tanken til næringsrådet er at turistane som vitjar turistinformasjonen ved Steinsdalsfossen, skal ha kort veg til lina. Frå Bjørketeigen kan det vera shuttle-bussar til Seberg.

– Mange er innom fossen i løpet av sommaren, men legg att lite pengar. Med ei zip-line kan me tilby ei oppleving til dei reisande før dei reiser vidare, seier Ljones.

– Må få vudering

Ljones understrekar at det ikkje er sikkert at det er mogleg å byggja lina. Det må fagpersonar greia ut.

Med forslaget frå Seberg til Bjørketeigen vil lina verta 2.300 meter lang. Alternativt kan den kortast ned til 1.600 meter, ifølgje Ljones.

Han hevdar at zip-lina vil verta den lengste og høgaste i Noreg dersom den vert realisert.

Næringsrådet anar ikkje kva det vil kosta å byggja ei zip-line, men Ljones seier at det gjerne vil kosta kring 50.000 kroner å greia ut om prosjektet er mogleg å realisera.

Dersom zip-lina er realistisk, må investorar på banen viss prosjektet skal gjennomførast.

– Gode tilbakemeldingar

Ifølgje Ljones er grunneigarane på den føreslegne landingsstaden positive til ideen.

Ljones har også presentert ideen for Thon Hotel Sandven, som har oppmoda næringsrådet om å søkja pengar til utgreiinga frå Olav Thon stiftinga. Det skal næringsrådet gjera.

I tillegg er Reisemål Hardanger fjord AS og rådmannen i Kvam positive, seier Ljones.

Han meiner ei zip-line vil verta ein fantastisk attraksjon der turistane vil kunna sigla over Movatnet og samstundes få utsikt over Norheimsund og fjorden.

– Det finst fleire slike liner i Noreg. Vil denne vera spektakulær nok til å trekkja turistar?

– Det er eg ikkje i tvil om. I tillegg vil det kunne gje ei god fartskjensle sidan lina vil gå tett inntil fjellsida. Toppfarten vil kunna vera 120 kilometer i timen, seier Ljones.

Lina vil vera i alle fall 150 meter over terrenget, ifølgje Ljones.

Fleire liner

Zip-lina bør ha minimum to til tre liner, slik at folk kan oppleva turen på lina saman, meiner Ljones. I Stoderzinken kostar ein tur med lina 39 euro per person. Ljones trur difor ein kan ta 400–500 kroner per person dersom prosjektet skulle verta realisert. Ein tur ned lina vil ta kring tre minutt.

Tilbodet vil vera så interessant at folk vil komma til Kvam eins ærend for å nytta lina, trur Ljones.

Næringsrådet vil søkja om stønad frå potten med kompensasjon for arbeidsgjevaravgift til å greia ut prosjektet, men Ljones seier at rådet om naudsynt vil leggja ut for utgreiinga sjølv.

– Såpass må me våga å satsa, seier Ljones.