Arbeidsløysa har ikkje nådd Jondal

Jondal ligg på syssesetjingstoppen i Hordaland med ei arbeidsløyse på 1,3 prosent. Talet på arbeidslause har ikkje endra seg det siste året. Også Granvin, Masfjorden og Voss har høg sysselsetjing.

Kvam ligg eit par hakk under med 2,8 prosent arbeidslause. Dette er som landsgjennomsnittet, og vil seia at det i november var 21 fleire kvemmingar utan jobb enn for eitt år sidan. Kvam ligg på same nivå som mellom andre Fusa, Tysnes og Fitjar. Dette går fram av novemberoversynet frå Nav.

Øygarden hadde den høgaste arbeidsløysa i Hordaland med 6 prosent, tett følgt av andre kyst- og oljekommunar.

Medan arbeidsløysa i landet totalt har minka med 1 prosentpoeng til 2,8 prosent, har Hordaland den største auken. Nedgangen i november kom etter nokre månader med teikn til betring.

– Utviklinga var ikkje venta, skriv fylkesdirektør i Nav Hordaland, Anne Kverneland Bogsnes, i ei pressemelding.

Dei fleste ledige finn ein i industrien, bygg og anlegg og ingeniør- og IKT-fag. Dei fleste hordalandingane utan arbeid er i aldergruppa 30–39 år.