Golis på 2. plass for MDG

Natalia A. Golis (36) frå Kvam er på 2. plass på stortingslista til MDG i Hordaland.

Det vart klart etter nominasjonsmøtet i Bergen i dag, opplyser MDG i ei pressemelding.
Øvst på lista står Arild Hermstad (50).
Golis er bygde- og næringsutviklar i Ulvik og fylkestingsrepresentant. Ho er oppteken av å sikra eit næringsliv som kan gjera Noreg til eit fornybar-samfunn.
– Vestlandet er rikt på naturressursar, og me har eit næringsliv som har både potensialet og kompetansen til å driva ansvarleg og framtidsretta, seier ho i pressemeldinga.

Håpar på eitt mandat

Målet er å få eitt hordalandsmandat på Stortinget og bidra til at MDG kjem over sperregrensa nasjonalt.
– Det tru me er realistisk. Mange hordalendingar har eit sterkt miljøengasjement og vil stemma på oss og det samfunnet me ynskjer å skapa med auka livskvalitet og velferd, og samstundes tek vare på naturen, seier Golis.