Badeprosjekt står i stampe

Hardangerfjord hotell i Øystese har eit utslite kjøkken og ventar på bygging av Hardangerbadet for at det skal verta oppgradert. Samstundes arbeider hotelleigar DNB framleis med å selja hotellet.

Mattilsynet hadde i vinter to tilsyn på hotellet der det vart påpeika at kjøkkenet ikkje oppfyller dagens krav til standard. Ifølgje Mattilsynet er kjøkkenet og tilhøyrande lokale generelt utslitne og av eldre standard. Kjøkkenet har gjennomgåande skadar, sår og rust.

Næringsmiddelhygieneføresegna har klare krav om at lokale der det er næringsmiddel, skal vera i god stand og lette å reingjera, skriv Mattilsynet.

Gamalt kjøkken

Ifølgje Mattilsynet er kjøkkenet gamalt og generelt nedslite. Planløysinga er heller ikkje den beste for å sikra god logistikk og hindra såkalla kryssureining, det vil seia at det kjem mikroorganismar over frå urein mat til rein mat.

Hardangerfjord hotell AS har i kommunikasjonen med tilsynet sidan 2014 vist til at det skal byggjast nytt kjøkken når Hardangerbadet vert realisert. Mattilsynet bad i vinter hotellet vurdera kva som vert gjort med kjøkkenet om det ikkje vert realisert.

Ønskjer framhald av hotell

Ordførar Jostein Ljones (Sp) informerte 21. september formannskapet om situasjonen til hotellet. Ifølgje ordføraren har kommunen informert DNB om at den ønskjer at ein ny investor skal driva hotellet.

Ordføraren har saman med rådmannen hatt eit møte med banken for å kartleggja tilstanden til eigedommen og kva DNB skal gjera.

Ljones sa i formannskapsmøtet at DNB ser på interne endringar som kan gjerast på hotellet, og at det ligg føre pålegg om endringar frå Mattilsynet.

– Kjenner ikkje til

DNB avviser på si side at det ligg føre krav om betring av kjøkkenet. Tilsyna fann stad før DNB overtok hotellet i mai. I ein e-post til HF skriv informasjonsdirektør Even Westerveld at naudsynt vedlikehald vert vurdert kontinuerleg.

Ifølgje Westerveld arbeider banken framleis med å finna ein profesjonell, langsiktig eigar av hotellet. Banken har engasjert ein ny, profesjonell forvaltar som skal sjå på drifts- og marknadsmessige tilpassingar.

Westerveld skriv at DNB ikkje har handfaste planar om sal av hotellet.

Ifølgje Jostein Ljones er det stillstand i Hardangerbadet-prosjektet til hotellet får ein ny eigar.

Ventar på avklaring

Det stadfestar dagleg leiar Martin Vik i Hardangerbadet AS. Han seier det er avgjerande at hotellet får inn ein ny eigar som er villig til å satsa på både hotelldrifta og Hardangerbadet. Det har selskapet signalisert til DNB, fortel Vik.

– Det er vanskeleg å arbeida vidare før hotelldelen er på plass. Me har lege roleg ei tid medan me har venta på ei løysing, seier han.

Han synest ikkje noko om at hotellet ventar på Hardangerbadet for å få oppgradert kjøkenet. Vik seier DNB anten bør ta kjøkengrep sjølv eller få inn ein ny eigar raskt.

Har søkt om pengar

Hardangerbadet har søkt Sparebankstiftinga om Hardanger om fire millionar kroner i stønad. Frå før har stiftinga løyvt éin million. Kvam herad har søkt fylkeskommunen om seks millionar i kompensasjon for arbeidsgjevaravgift til prosjektet. Ifølgje Jostein Ljones gjeld søknaden berre viss det vert konkretisert kva som skjer med Hardangerbadet til pengane vert delte ut.

Ljones seier Kvam herad ikkje har planar om å endra vedtaket om å setja av 20 millionar til prosjektet før det er avklart kva som skjer med hotellet.

– Me er interesserte i å vera med på prosjektet, men det er avhengig av at ein får inn nye eigarar av hotellet, seier han.

Minnestund med føkgjer

Det første tilsynet med hotellet vart gjennomført i januar, etter at kring femti personar vart sjuke etter ei minnestund på hotellet. Hotellet tok saka alvorleg og gjorde eigne granskingar i tillegg til Mattilsynet sine, skriv Mattilsynet i tilsynsrapporten.

Etter å ha gått gjennom rutinane og alle sider av serveringa, kunne hotellet sjølv ikkje finna nokon openberr svikt. Mattilsynet kunne heller ikkje peika på forhold som kan ha ført til matforgifting.

– Kjøkkenet stod fram som reint og ordentleg, skriv Mattilsynet.

Etter tilsynet kunne Mattilsynet dermed korkje stadfesta eller avkrefta at sjukdomsutbrotet skuldast matforgifting knytt til hotellkjøkkenet.

Har ein plan

Hotellet sende planane for det nye kjøkkenet til Mattilsynet etter den andre inspeksjonen i februar.

I tillegg har hotellet gjort ei rekkje mindre grep for å betra tilstanden på kjøkkenet. Det er blant anna laga ny overflate på golvet, slipt vekk rust på ei dør og ei list, og skifta to trillebord og viftegitter på kjøkkenet, skreiv sals- og marknadsdirektør i Brakanes Hotel Group, Tore Reine.

Reine skreiv at skulle det visa seg at Hardangerbadet ikkje vert ein realitet, er hotellet innforstått med at det eksisterande kjøkkenet ikkje tilfredsstiller dagens standard og at noko må gjerast.

Mattilsynet er nøgd med svaret frå hotellet, og avslutta difor saka i byrjinga av februar.