Håp for Holmatun likevel

Som HF skreiv i mai, er ungdomshuset Holmatun i Øystese blitt ein klamp om foten til eigaren Foreininga Holmatun. Store utgifter og små inntekter gjer det ærverdige bygget til eit tapsprosjekt eigarane helst vil kvitta seg med. Om ingen vil ha Holmatun, kan løysinga vera å riva bygget.

Gjermund Stuve leier arbeidet med å selja ungdomshuset. Han fortel at ein aktør som vurderer å kjøpa bygget, er komen på banen. Bygget skal brukast til nærings- og kulturaktivitetar, men skal framleis kunna leigast av lag og privatpersonar, som i dag. Samtalar er i gang, men ingen avtalar signerte. Vona er at detaljane skal falla på plass i løpet av november.

HF har vore i kontakt med interessenten, som ikkje ynskjer å fortelja om planane enno.