Børven til Brann
Torgeir Børven (24) frå Øystese er vorten Brann-spelar.
Kvemmingar som ynskjer å sjå lokale heltar spela toppfotball, får enklare kår. Med overgangen til Børven har Kvam ein spelar i Bergen i toppserien for både menn og kvinner (les om Vilde Øyri på side 12 og 13).
Om ikkje det hende over natta, så gjekk det nokså snøgt då rykta byrja gå om overgangen til Børven. Tidlegare i veka var han klar for klubben, i fyrste omgang på lån ut året. Klubben har sikra seg opsjon på kjøp seinare.
Likar synet
Onsdag trena han med tippeligalaget i Bergen for fyrste gong, alt ifølgje Bergens tidende.
Trenar Lars Arne Nilsen seier til regionavisa at kvemmingen ”ser veldig fin ut”.
– Han har ein nydeleg touch og bevegar seg fint. Det er ein elegant fotballspelar som det er kjekt å ha her, seier Nilsen.
– Ein er alltid litt nervøs og spent før fyrste trening, så det var godt å få henne unna, seier Børven til BT.
Kvemmingen har valt drakt nummer 22. Han hadde same nummer i Odd, ifølgje brann.no
Artikkelen held fram under annonsen.
Tek ein sjanse
Komande helg møter Brann Rosenborg i Bergen. Det er uvisst om Børven får spela. Sjølv trur han ifølgje BT at det kan verta tøfta for lekamen å spela heile kampen.
Spissen som i si tid spela for Øystese, var innom Odd og Vålerenga før han reiste til Twente i Nederland i 2013. Der har han delteke i 42 kampar, men vore plaga med rygg- og hofteproblem. Sistnemnde vart han operert for og dermed sett på sidelina i nesten eitt år. Han har framleis smerter etter å ha vore i aktivitet, men er i stand til å trena og spela.
Sportssjef Rune Soltvedt i Brann seier til BT at skadehistoria til Børven har vore drøfta, og vedgår at klubben tek ein sjanse. Men Børven passerte den medisinske testen, og at avtalen er god ettersom Twente dekkjer ein del av løna til 24-åringen frå Kvam.
– Me har veldig tru på at Børven kan starta karrieren på nytt i Brann, seier han til BT.
Soltvedt seier til brann.no at 24-åringen passar for Brann mellom anna av di han er lokal, i rett alder, fungerer i 4–3–3-formasjon, kjenner Tippeligaen og har ein personlegdom som passar Brann-verdiane. Dessutan er taiminga god, meiner sportssjefen.
