Slapp unna utan personskade

Mannen i 40-åra som var involvert i billulukka i Vangdalsberget i går føremiddag, er ikkje fysisk skadd, slik politiet opplyste om kort tid etter ulukka. Bilføraren vart frakta til Haukeland sjukehus, der det vart slått fast at han ikkje hadde fått personskade.
Ifølgje lensmann Terje Sperrevik i Kvam og Samnanger lensmannsdistrikt er det ikkje mistanke om promillekøyring eller farleg forbikøyring. Politiet opplyste fyrst at mannen var mistenkt for køyring i rusa tilstand.
Ingen andre bilar var involverte i ulukka, der bilen hamna i autovernet på andre sida av vegen – med andre ord ikkje i fjellveggen, slik politiet fyrst opplyste. Mannen brukte bilbelte.
– Det er for tidleg å seia noko om grunnen til ulukka, seier Sperrevik til HF.