Desse skal styra bompengeselskapet

Alexander Fosse Andersen er ny styreleiar i Kvam bompengeselskap AS.

Han vart vald på generalforsamlinga i selskapet 23. juni. Andersen overtek etter Reidun Rasmussen Mjør. Dei andre medlemene i styret er Kari Sørensen Bernardini, Frode Nygård, Anne Grete Berge og nestleiar Oddvar Brakestad. Varamedlemer er Heidi Sandven Botnen, Dag Rune Mo, Ronny Samland, Arne Sandven og Martin Vik.

Generalforsamlinga i Bergen samla berre Mjør, dagleg leiar Brakestad, ordførar Jostein Ljones frå Kvam herad og Pål Kårbø frå Hordaland fylkeskommune. Dei godkjende årsmeldinga og rekneskapen utan merknader.

I den årlege orienteringa til aksjonærane, datert seks dagar før generalforsamlinga, skriv styreleiar Mjør og dagleg leiar Brakestad at mange meiner trafikantbetalinga i Kvammapakken er høg, men at selskapet har fått mange gode tilbakemeldingar frå trafikantane om dei nye vegane også i 2015.

Frå 2014 til 2015 auka den samla trafikken i Kvammapakken med 4 prosent. 5,9 prosent fleire bilar passerte bomstasjonen i Steinsdalen, medan trafikken gjekk ned med 1 prosent på Kjepsohøgda.

Trafikken på Kvamskogen gjekk ned i perioden 2008–2013, men auka til 2014. Kanskje har den såkalla avvisingseffekten spela inn, spekulerer leiinga i selskapet, som minner om at betre vegar, Hardangerbrua og Jondalstunnelen vil gje positiv effekt.

KB-leiinga reknar med eit tap på fem–seks millionar kroner i 2015 som følgje av raset i Tokagjelet i 2013. Truleg har diverse vegarbeid på fylkesveg 7 ført til redusert, trafikk, heiter det i orienteringa.

Kostnaden med innkrevjing og bomstasjonar var 3,1 millionar kroner i fjor. Drifta av KB var knapt 0,6 millionar kroner.

Mjør og Brakestad opplyser at Kvammapakken kjem til å sprekka med god margin, men storleiken er uviss av di ein ikkje veit eksakt kva dei siste prosjekta i Kvammapakken vil kosta.