Fekk ikkje innsyn i strategiar i omstridd kraftsak

HF fekk ikkje fullt innsyn i eit dokument som gjeld kraftprosjektet til Øystese kraft AS. Fylkesmannen stadfesta 20. mai det kommunale vedtaket om å gje HF berre delvis innsyn i dokumentet.

Dokumentet er ein presentasjon Norsk kraft AS har laga for Øystese kraft. Det vart vist i eit møte for eigarane av sistnemnde selskap. Mellom eigarane er Kvam herad, som ikkje ville gje fullt innsyn av di kommunen har høve til å gjera unntak frå innsynsretten i dokument som gjeld selskap der kommunen har eigarinteresser, og som vert handsama av kommunen som eigar.

Fylkesmannen viser til at dei hemmeleghaldne opplysingane i dokumentet er Norsk kraft sine vurderingar av innstillinga frå Noregs vasskraft- og energidirektorat i saka om Øystesevassdraget.

– Offentleggjering av vurderingane og strategiane vil kunna svekkja stillinga i den vidare prosessen med Øystesevassdraget. Øystese kraft er ikkje omfatta av lova, og Kvam herad si stilling vert svekt i kraft av å vera eigar i selskapet og ikkje i kraft av å vera eit forvaltingsorgan. Omsynet til offentleg innsyn veg difor ikkje tyngre enn behovet for unntak, skriv Fylkesmannen i vedtaksbrevet.