Kinesarar vekte promillemistanke

Fredag fekk politiet tre meldingar om promillekøyring. Det viste seg å vera kinesisk turistar med manglande køyreferdigheiter.

Ifølgje politioverbetjent Andor Helgheim i Kvam og Samnanger lensmannsdistrikt starta den kuriøse historia med ein telefon frå ein fortvila turist som fortalde at han hadde vorte fråteken bilnøkkelen. Det viste seg at ein truleg svært irritert bilist som køyrde bak bilen med dei kinesiske turistane, hadde stoppa bilen og teke nøklane frå sjåføren. Politiet fekk spora opp nøklane, og turistane fekk halda fram.

Kort tid etter kom den fyrste meldinga om vinglete køyring i Samnanger. Då hadde ikkje politiet ressursar til å rykkja ut.

Etter ei stund fekk politiet på nytt melding om mistenkjeleg køyring, denne gongen i Tokagjelet. Politiet rykte då ut med blålys og sirener og møtte bilen. Personane i bilen tok ikkje hintet og heldt fram med å vingla nedover Steinsdalen i 40 kilometer i timen, med politiet og ei lang rekkje andre bilar i hælane. Rett før rundkøyringa i Norheimsund kom politiet seg forbi og fekk stoppa sjåføren.

Gjestene fekk då undervising i kva sirene og blålys inneber, og ei klar formaning om å konsentrera seg om køyringa, ikkje naturen.

Ei stund etter tikka det inn ei ny melding om mogleg promillekøyring.

– Dette var veldig spesielt. Slike opplevingar er svært sjeldne, fortel Helgheim.

Politiet hadde ikkje høve til å ta sertifikatet frå dei kinesiske turistane, men slike episodar kan føra til køyreforbod.

Etter det politiet kjenner til, skulle det kinesiske reisefølgjet austover.