Hyttedraumen som vart eit mareritt

Etter to år er hyttene ved Mælen i Herand framleis ikkje ferdige. Dei ni para som kjøpte ”nøkkelferdig” hytte av Hardanger hyttepanorama AS, har fått nok. Dei krev at selskapet vert slege konkurs.

– Det siste året har vore eit mareritt. Dette har øydelagt fritid og feriar, og me har lagt ned enormt mykje arbeid for å prøva å komma vidare i saka, seier Marita Linga, som er ein av hyttekjøparane saman med kjærasten Hans-Eirik Thue.

På vegner av kjøparane har Marvin Sigve Halleraker oppmoda Hardanger tingrett om å slå Hardanger hyttepanorama (HHP) konkurs. Saka var oppe førre torsdag. Halleraker si hytte er framleis dekt av presenning og langt frå ferdig utvendig og innvendig. Han fryktar at heile hytta er ubrukeleg og må rivast.

Ifølgje HHP skulle hyttene i utgangspunktet vera ferdige tre månader etter byggjestart og klare til sommaren 2015. Etter dette har seinkingar, feilkonstruksjonar, manglande informasjon og kontraktbrot prega prosjektet, ifølgje kjøparane.

Alle dei ni kjøparane kravde nyleg heving av kontrakten med HHP, som avviser hevingskravet. Ifølgje HHP vart selskapet lurt av Byggservice Norge AS, som gjorde tømrararbeidet.

Feil og manglar

Alle dei ni hyttene har framleis feil og manglar, to år etter at nokre av kontraktane vart signerte. Hyttene til Halleraker og Linga er dei det står dårlegast til med, medan fire av hyttene nesten er feilfrie utvendig. Tre av hyttene er ikkje påbyrja enno. Det innvendige arbeidet er ikkje gjort i nokon av hyttene.

Alle kjøparane har betalt inn 800.000 kroner for tomta. I tillegg har dei betalt to delsummar for hyttene til HHP, på til saman 1 million kroner, som utgjer 60 prosent av kjøpssummen. Det første innskotet på 30 prosent fann stad då dei inngjekk kontrakten, medan den andre innbetalinga på 30 prosent vart gjort då materialane til hytta kom på tomta. Denne betalinga skulle sikra tett hytte.

Kring påske kravde HHP ei tredje innbetaling frå dei fire hyttekjøparane som har nokolunde feilfrie hytter. Desse har nekta å betala inn meir pengar til HHP fordi det framleis gjenstår arbeid på hyttene og fordi ikkje alle kjøparane har tette hytter.

Frå HHP stilte styreleiar Glenn Emanuel Olsen, som er tidlegare eigar av Vassel gard, og dagleg leiar André Olsen i retten. André Olsen er sonen til Glenn Olsen. Det same er tidlegare dagleg leiar Michael Fjeldstad.

– Ikkje lenger håp

Kjøparane har lenge frykta at HHP skulle slå seg konkurs, og har difor vore tolmodige med verksemda. Halleraker og Linga vitna i konkurssaka på vegner av kjøparane. Halleraker sa at kjøparane ikkje ser nokon annan utveg enn konkurs.

– Me trur ikkje lenger at dette kan ordna seg. Me har vore livredde for å tapa alle pengane våre.

Linga fortalde i retten at kjøparane har hatt ei konstant uro for at HHP skulle gå konkurs. Kjøparane har lagt ned ein stor innsats for å berga hyttene og pengane.

– Berre eg har brukt mellom 130 og 150 arbeidstimar på dette, sa Linga.

– Nydeleg område

Halleraker fortalde at han og kona i utgangspunktet ikkje hadde tenkt å kjøpa hytte etter å ha vorte lurte då dei kjøpte ei gamal hytte for mange år sidan. Han vart freista av den fantastiske naturen på Mælen då han vitja Hardanger kulturgalleri, og fekk høyra at ein kamerat hadde kjøpt hytte i feltet.

– Me fall for landskapet. Me tok kontakt med dagleg leiar Fjeldstad og fekk eit prospekt der det stod ”velkommen til det gode liv”. Det er ei ironisk overskrift i dag, sa Halleraker.

Linga seier til HF at både ho og Thue bur i Bergen, men har vore mykje hos familie i Herand.

– Me kjenner området godt. Då prosjektet til HHP kom, heiv me oss på, diverre, seier Linga til HF.

Ønskjer å ferdigstilla

Glenn Olsen sa i retten at HHP ønskjer å ferdigstilla hyttene dersom verksemda får høve til det av kjøparane. Ifølgje Olsen tek HHP sjølvkritikk for feil og manglar i hyttene.

Han fortalde at tidlegare dagleg leiar har vorte sjukmeld av situasjonen på grunn av ubehagelege e-postar frå kjøparane, og etter å ha vorte lurt av Byggservice Norge.

– Me er i den situasjonen me er fordi Byggservice Norge gjorde ein dårleg jobb, sa Olsen.

HHP avslutta kontrakten med entreprenøren 30. september 2015, og måtte då finna andre byggmeistrar som kunne gjera ferdig arbeidet med hyttene. Fagbygg AS og Øystese-selskapet Viking-tre AS fekk jobben. Sigmund Hovland vart hyra som byggjeleiar.

Olsen opplevde at han fekk ny tillit frå kundane etter at det kom nordmenn inn i prosjektet. Arbeidarane til Byggservice Norge var estlendarar.

Styreleiaren viste til at han har vore sjølvstendig næringsdrivande i femti år, og sa at han alltid har vore seriøs og gjort opp for seg.

Ifølgje Olsen kan HHP ikkje få att pengar frå Byggservice Norge, som no er konkurs.

– Graverande forhold

Halleraker meiner det var ei rekkje graverande forhold i hyttefeltet då han vitja det i fjor sommar. Bord var sette opp feil veg, og hyttene var skeive og dermed eksponerte for vêr og vind.

– Me bad om å få eit møte på Vassel i september, men HHP kunne ikkje stilla. Den estiske byggjeleiaren for Byggservice Norge stilte. Han skulda på konstruksjonsfeil i arkitekten sine teikningar, sa Halleraker.

Same dagen vart det oppdaga at éi av hyttene var i så dårleg stand at den måtte stengjast fordi det var farleg å gå inn i den.

– HHP seier selskapet vart lurt av Byggservice Norge, men HHP hadde full moglegheit til å kontrollera dette sjølv, seier Linga.

Thue seier til HF at han har snakka med folk i byggjebransjen som aldri har sett så detaljerte teikningar før. Også andre kjøparar meiner arkitekten hadde svært gode teikningar.

Usemje om betalingsevne

Advokaten til kjøparane, Jan Magne Isaksen, argumenterte i tingretten for at HHP ikkje har verdiar att i selskapet til å gjera opp for all gjeld, og at selskapet difor må slåast konkurs.

Kjøparane har fått medhald i retten i å ta arrest i tre faste eigedommar knytte til gard nummer 2/22, som er garden hyttetomtene er skilde ut frå.

– Dette er dei einaste eigendelane HHP har, og selskapet har langvarige betalingsproblem, sa Isaksen.

Han argumenterte for at det er ein markant underbalanse i verksemda, sjølv om ein ser for seg eit ”best case-scenario” der HHP får selt dei resterande ni tomtene i feltet. Seks av dei er ikkje frådelte.

– Sjølv med eit ”best case-scenario” vil gjelda overstiga eigendelane med 6,2 millionar, hevda Isaksen.

Han la til at alle hytteeigarane har krav på dagmulkt på grunn av seinkingane, til saman nærare 1,4 millionar. To av hyttene har betalt inn over 850.000 kroner i forskot, utan at hyttene er påbyrja. I tillegg vil det truleg kosta minimum 2,5 millionar kroner å ferdigstilla hyttene dersom ein trekkjer frå alt kjøparane skulle ha betalt etter kontrakten, ifølgje Isaksen.

– Berre hyttekjøparane sine krav kjem på 4,75 millionar. Gjelda til verksemda er på nesten 11,1 millionar kroner. Me ser det ikkje som realistisk å få til noka løysing, sa Isaksen.

Han viste til at selskapet også skuldar Viking-tre AS 1,5 millionar kroner og Fagbygg AS over 1,4 millionar kroner for arbeidet med å retta feil på hyttene.

Advokaten til HHP, Gunnar Angaard, sa at HHP er samd i at likviditeten i selskapet er dårleg, men ikkje i at gjelda overstig eigendelane.

– Me trur at likviditetssituasjonen er forbigåande og at selskapet snart får pengar til å gjera opp for seg, sa Angaard.

HHP meiner å ha eit reelt inntektspotensial på 15,8 millionar.

Tomter og avgift

Angaard viste i retten til at HHP framleis har krav på to innbetalingar til frå hyttekjøparane dersom selskapet følgjer kontrakten. I tillegg har HHP nesten ferdigstilt eit vass- og avløpssystem (VA). For dette kan HHP krevja ei tilknytingsavgift på 125.000 kroner per hytte, hevda Angaard.

Advokaten hevda i tingretten at det ikkje er omtvista at ein skal betala ei slik avgift. I tillegg er det fem hytter i eit anna felt som skal kopla seg på VA-anlegget, ifølgje Angaard.

Han sa også at det står att å selja åtte tomter, og at Olsen reknar med å kunna få éin million per tomt.

Kjøparane betalte 800.000 for sine tomter, og 200.000 gjekk til VA-anlegget. Olsen meiner dei beste tomtene framleis ikkje er selde, og at desse difor kan verta dyrare.

– HHP har ikkje kunna halda fram salsprosessen på grunn av arresten, og det er ein uheldig situasjon, sa Angaard, som la til at HHP erkjenner at kjøparane har hamna i ein vanskeleg situasjon.

Isaksen meiner inntektspotensialet HHP skisserer, er urealistisk.

– Dette er i beste fall utopisk, sa han, og påpeika at det er truleg at dei beste tomtene vart selde først.

– Ikkje avtalen

Isaksen delte i retten ut e-postar kjøparane hadde fått frå tidlegare dagleg leiar Michael Fjeldstad. Han skriv i desse at kvar kjøpar ikkje skal betala mykje meir enn 5.000 kroner for VA. Angaard sa at HHP meiner å ha krav på avgifta basert på kommunikasjon mellom selskapet og kjøparen.

– Men eg ser e-postkorreksjonen som er lagt fram, sa advokaten til HHP.

Vidare argumenterte Angaard for at kjøparane ikkje har rett på dagmulkt av di dei ikkje har skaffa finansieringsbevis.

– Arbeidet med hyttene vart sett seint i gang på grunn av dette. HHP var ikkje forplikta til å starta bygginga før verksemda fekk slik dokumentasjon, sa Angaard.

– Slikt bevis etterspurde du 8. juni, etter at kjøpet var heva, påpeika Isaksen.

Glenn Olsen seier til HF at han ikkje hadde kjennskap til e-postar som sa at kjøparane ikkje skulle betala noko særleg for VA.

– Har vore eit ”gissel”

Halleraker var den siste som inngjekk kontrakt med HHP. Dermed er hans hytte den det er gjort minst med. Feila til Byggservice Norge er ikkje retta. Halleraker meiner HHP har nytta han som ”gissel” for å få dei fire andre kjøparane som har dei ”beste” hyttene til å betala inn det tredje avdraget.

– Eg opplevde det som veldig utidig. Heldigvis har kjøparane klart å stå saman, sa Halleraker.

Olsen sa i retten at HHP måtte fiksa éi og éi hytte etter når kontrakten var inngått på grunn av mangel på folk. HHP har ikkje bevisst valt å nedprioritera hytta til Halleraker, ifølgje styreleiaren. Olsen hevda at det framleis skal vera mogleg å reparera hytta.

– Ein må ta vekk isolasjonen og tørka den før ein byrjar å gjera hytta feilfri. Det er fullt mogleg, men me må få ein sjanse til å gjera det, sa han.

Olsen sa at HHP har retta feil på fire av dei sju påbyrja hyttene, og er i gang med den femte.

Ifølgje Olsen har ikkje kjøparane av dei fire hyttene som er tette, betalt det tredje avdraget.

– Sidan me ikkje fekk betaling, fann me ut at me måtte gjera ferdig hyttene som var der og ikkje selja fleire, sa Olsen.

Halleraker seier til HF at han framleis kjenner seg som eit gissel etter at HHP sa i retten at selskapet vil gjera ferdig hyttene berre selskapet får inn meir pengar.

– Det har vore ein utruleg vanskeleg situasjon. Eg har betalt for å få alle materialane på tomta og tett hytte, men har ei heilt øydelagd hytte. Me taper vesentleg meir pengar på dette enn dei andre, sjølv om alle har betalt inn same sum, seier han.

Også hytta til Halleraker skulle vore ferdig for eitt år sidan.

Reagerer på framstilling.

Halleraker reagerer på at Olsen skuldar kjøparane for at bygginga stoppa opp.

– Folk vegrar seg for å betala på grunn av historikken. Me har ikkje fått dei mest grunnleggjande ting. Ingen har fått høyra at me må leggja fram finansieringsgaranti. Me har også etterspurt både bankgaranti og forsikringsbevis utan å få noko, sa Halleraker.

Han seier at han også vart forsikra fleire gonger av tidlegare dagleg leiar Fjeldstad om at VA-avgifta skulle komma på maksimalt 6.000 til 8.000 kroner.

Linga seier at både ho og Thue har vist Fjeldstad at finansieringa er i orden. Dette vart godkjent av HHP, og hytta vart bestilt. Ho meiner difor at påstanden om at byggjearbeidet kom seint i gang fordi dette mangla, ikkje held mål.

Halleraker sa i retten at han kunne skaffa slikt bevis dersom han berre hadde vorte beden om det.

– Me har betalt inn alt me skal, sa Halleraker.

Olsen tok sjølvkritikk for ikkje ha skaffa bankgaranti, noko som er pålagt etter bustadoppføringslova og som gjev kjøparane rett til å halda tilbake pengane.

– Me skulle ha prioritert det, sa Olsen.

– Me reagerte tidleg

Linga fortalde i retten at ho tidleg merka at noko ikkje var som det skulle med hytteprosjektet. På første kontraktsmøtet fekk ho og Thue presentert ei ekstra rekning på 200.000 kroner for endringar på hytta. Desse endringane hadde tidlegare dagleg leiar lova skulle vera inkluderte i kjøpesummen, ifølgje Linga.

– Me hadde sagt at me ikkje hadde råd til å betala meir enn kjøpesummen og difor ikkje kunne få nokon overraskingar. Det vart me lova at me ikkje skulle få, sa Linga, som la til at HHP trekte rekninga etter at ho klaga på den.

Ho meiner det gjennomgåande for kjøparane har vore at HHP har vore fullstendig uprofesjonelle og utan etikk og moral. HHP har heller ikkje informert kjøparane om kva som har gått føre seg, ifølgje Linga.

Halleraker seier at han følte han vart møtt med sinne og sutring når han tok kontakt med HHP for å få informasjon.

– Det har vore vanskeleg å få svar på konkrete spørsmål. Den informasjonen me har fått, har kome frå folk som har vore på staden og frå dei norske entreprenørane som kom inn i prosjektet, seier han.

– Har prøvd å hjelpa dei

Thue og Linga seier kjøparane i fjor sommar prøvde å hjelpa HHP då dei såg kor mangelfulle hyttene var.

– Me varsla HHP om alle feila etter at me skreiv ei lang mangelliste. I tillegg sa me at det burde komma inn norske byggmeistrar fordi Byggservice Norge ikkje såg ut til å vita kva dei dreiv med. Dette sa me for å berga hyttene og for at HHP skulle sleppa å få store krav mot seg i ettertid, seier Thue.

Paret hadde sjølv med ein kamerat som er tømrar på tur til hyttefeltet. Han avdekte ei rekkje manglar og feil.

Ifølgje Olsen avslutta ikkje HHP kontrakten med Byggservice Norge med det same dagleg leiar fekk beskjed om alle feila. Grunnen var at Byggservice Norge skal ha lova å retta feila.

– Me gav dei sjansar og dei lova å ordna opp. Til slutt gjekk det ikkje lenger. Byggservice Norge er årsaka til problema, seier Olsen.

– Me vart lurte

Linga og Thue seier at i starten gav HHP inntrykk av at alt var mogleg og at selskapet hadde store visjonar. Etter kvart som kundane stilte spørsmål, fekk dei inntrykk av at HHP såg på dei som plageånder.

– Me fekk etter kvart beskjed om å berre forholda oss til advokaten til HHP, sjølv om me var høflege i alle e-postar og viste til kontrakten, seier Linga.

Kjøparane har også bede om fleire møte, men HPP har nekta å delta etter eit fellesmøte i Norheimsund hausten 2015.

– Det er drastisk å oversjå folk som har betalt inn mange millionar til selskapet ditt, seier Thue.

Vil åtvara andre

Kjøparane ønskjer å åtvara andre mot å komma i same situasjon som dei med HHP.

– Det er på tide å stoppa dei, seier Linga.

– Eg synest ikkje HHP skal få vera aktør i denne marknaden, sa Halleraker i rettssalen.

Olsen seier til HF at det var kjøparane, ikkje HHP, som først byrja nytta advokat.

– Eg meiner det er å sjå saka frå éi side å seia at det har vore vanskeleg å kommunisera med oss, men det er ikkje eg som har hatt kontakt med kjøparane, så eg veit ikkje meir om korleis den har gått føre seg, seier styreleiar Olsen.

Han viser til at HHP fekk ei rekkje e-postar frå kjøparane.

– Det var ingen dialog frå kjøparane og eit einsidig syn på tinga, men eg forstår hyttekjøparane, seier Olsen, som ikkje vil seia meir om kommunikasjonen med kjøparane.

– Vart utilgjengelege

Ifølgje Linga og Thue har kommunikasjonen med HHP vore svært vanskeleg etter at kjøparane stilte krav og bad HHP følgja kontrakten. Kjøparane har blant anna etterspurt ein bankgaranti og framdriftsplan, som dei har krav på, fleire gonger.

Trass håpet om at ting skulle betra seg etter eit møte i oktober, har kontakten med HHP berre vorte vanskelegare, ifølgje kjøparane. Dei bad i vinter om eit nytt møte med HHP for å prøva å ordna opp i ting.

– Då HHP berre ville møta dei fire som HHP meinte hadde tette hytter og som difor hadde fått rekning på neste innbetaling, gav me opp å prøva å få til noko meir, sa Linga.

Ho meiner det er frekt av HHP å påstå at ein ikkje kan byggja vidare på hyttene fordi kjøparane ikkje har betalt det dei skal.

– Etter vår meining har ikkje HHP bygd tette hytter, ikkje stilt bankgaranti, ikkje levert framdriftsplan og teke ut 200.000 kroner frå klientkontoen vår i Fana Sparebank eiendom AS utan løyve. I tillegg skuldar HHP kvar kjøpar om lag 160.000 kroner i dagbøter, seier Thue.

– Kvar har pengane me allereie har betalt, vorte av? Me har til saman betalt inn nærare femten millionar kroner, seier Linga.

Halleraker stadfestar at det har vore vanskeleg å kommunisera med HHP.

– Har ikkje tappa pengar

Olsen avviste i retten at han har tappa selskapet for pengar. Han seier til HF at HHP har brukt fem–seks millionar på infrastruktur og at resten av pengane har gått til Byggservice Norge og til hyttebyggjesetta.

Olsen vil ikkje svara på om det er mogleg å gjera hyttene ferdige utan neste delbetaling frå kjøparane.

– Hyttekjøparane ønskjer å slå oss konkurs og gå vidare med prosjektet sjølve. Det må eg forholda meg til og akseptera, seier Olsen.

Han seier han er lei seg for det som har skjedd, og at dersom han får ein sjanse til å ordna opp, vil han gjera det.

Står saman

Hyttekjøparane har heile tida stått saman om å prøva å løysa saka. Det er dette som gjer at dei har moglegheit til å be om at HHP vert slege konkurs.

– Hyttene ligg i eit nydeleg område, og me ser eit stort potensial der berre me kan gå vidare med prosjektet utan HHP, seier Linga.

Alle kjøparane ønskjer å utvikla hyttene.

– Me er alle vanlege lønsmottakarar som har strekt strikken for å realisera hyttedraumen, seier Thue.

Halleraker trur det vil verta vanskeleg for han og kona å få ferdig si hytte.

– Me ønskjer å få HHP slege konkurs, men det vert ingen jubelscener. Me kjem ikkje til å få att pengar. Me må berre gjera så godt me kan, og forholda oss til rasjonelle og anstendige aktørar framover, seier Halleraker.

Han håpar i beste fall å kunna klara å få ei tett hytte med det resterande lånet han har, slik at hytta kan stå ubrukt nokre år.

– I verste fall må hytta rivast, men eg har ikkje pengar til det, seier Halleraker.

Eksleiar: – Ingen kommentar

HF har vore i kontakt med tidlegare dagleg leiar i HHP, Michael Fjeldstad, om hans rolle i arbeidet med hyttene. Me har blant anna spurt kvifor det har vore vanskeleg for kjøparane å få kontakt med HHP, på kva måte e-postane til kjøparane var ubehagelege, kvifor han sa til kjøparane at det ikkje skulle vera store utgifter med vatn og avløp, om det er korrekt at han ikkje føretok seg noko då kjøparane sa frå om manglar og feil på hyttene sommaren 2015, på kva måte han vart lurt av Byggservice Norge AS, og kva HHP gjorde for å sjekka kvalifikasjonane til Byggservice Norge.

Fjeldstad seier i ein sms at han ikkje ønskjer å kommentera saka no. Han ønskjer alle hytteeigarane alt vel og beklagar på det sterkaste situasjonen.

Bank betalte ut pengar utan godkjenning

HHP skuldar også kjøparane pengar som har blitt betalte ut til selskapet frå Fana sparebank eiendom AS. Desse pengane var sette på ein klientkonto som ein garanti for at veg, vatn og kloakk skulle verta bygd ut, og skulle ikkje betalast ut før ferdigattesten var klar. Mellom juli og september 2015 betalte Fana sparebank ut 200.000 kroner til HHP frå kontoane til kvar av kjøparane utan å informera kjøparane.

Entreprenøren hadde ikkje søkt om ferdigattest enno. Kjøparane har kravd å få pengane tilbake. Fana sparebank har teke sjølvkritikk for utbetalinga og lagt seg flat. Banken har kravd 1,8 millionar betalt tilbake frå HHP.

HHP sin advokat, Gunnar Angaard, sa i retten at HHP meinte vegen var ferdig, men at ferdigattesten ikkje var gjeven. HHP vedgår at pengane ikkje skulle vore betalte ut utan ferdigattest, men meiner det heile er ei misforståing.

HHP argumenterte med at selskapet ikkje skuldar 1,8 millionar ettersom ein del arbeid er gjort, og at skulda difor berre er kostnaden med det som står att av arbeid. Ifølgje HHP er det eit pumpehus som vil kosta 243.000 kroner.

Byggservice Norge AS: – Dårlege materialar og dårlege teikningar

HF har vore i kontakt med leiinga i Byggservice Norge AS, som no er konkurs. Selskapet hevdar i ein e-post på dårleg engelsk at det største problemet med hyttene var at materialane og delane som hyttene skulle byggjast av, var av dårleg kvalitet.

I tillegg hevdar Byggservice Norge å ha synt HHP at det var feil i teikningane til arkitekt Alv Martin Vangdal, blant anna i vurderingane av stabilitet. Dette seier Byggservice Norge at det gjorde HHP og Vangdal merksame på i 2015, utan at det skjedde noko.

På grunn av dette stoppa Byggservice Norge arbeidet på feltet, hevdar selskapet.

Arkitekt Alv Martin Vangdal skriv i ein e-post til HF at påstanden om dårlege teikningar er ny for han. Vangdal seier at arbeidet til Byggservice Norge på byggjeplassen ikkje heldt mål. Ifølgje Vangdal var det uråd å få dokumentasjon på utført arbeid og om forankringar og samanføyingar var gjort i samsvar med produksjonsteikningar.

Byggservice Norge vart difor løyst frå kontrakten og sendt heim, opplyser Vangdal.

HF har stilt ei rekkje andre spørsmål til Byggservice Norge som selskapet ikkje har svart på. Me har blant anna spurt kva selskapet meiner om påstanden om at HHP har vorte lurt, kva arbeidarar som vart nytta til jobben, om Byggservice Norge sjekka kvalifikasjonane til arbeidarane som vart nytta, når HHP gav beskjed om at arbeidet Byggservice Norge ikkje gjorde var godt nok, og om det er korrekt at Byggservice Noreg fekk fleire sjansar til å retta opp feila på hyttene utan at dette vart gjort.

Byggservice Norge hevdar også at HHP skuldar dei 2,4 millionar kroner for arbeidet og materialane, medan HHP hevdar Byggservice Norge skuldar dei pengar fordi arbeidet ikkje vart gjort som det skulle.

HF presiserer

Marita Linga, ei av dei som har kjøpt hytte av Hardanger hyttepanorama AS, er systera til redaktør i HF, Sigbjørn Linga. Han reknar seg difor som ugild i saka, og har ikkje delteke i det journalistiske arbeidet med artiklane. Linga har like fullt redaktøransvaret for det som vert publisert, og har såleis sett all tekst og alle bilete før publisering.

HF gjer merksam på at bileta frå Lagunen i 2014 som er nytta i artikkelen, vart tekne av Linga før Marita Linga kjøpte hytte.