Eirik Ulltang. NM i trial i Norheimsund.

Ventar eliten til Norheimsund

Mange av dei beste i landet kjem til Kvam i helga når Hardanger sykkelklubb inviterer til noregsmeisterskapen i trialsykling.

Rekordmange deltakarar er venta til arrangementet.

– Til no er det 28 påmelde. Det er ny rekord. Den gamle rekorden var på 25. Eg veit også at fleire kjem til å melda seg på. Me kjem truleg til å bikka 30 deltakarar, fortel trialsyklist og pressekontakt for arrangementet, Eirik Ulltang.

Arenaen ved grusbanen i Norheimsund har fått ei ansiktsløfting sidan i fjor.

– Me har ommøblert heile arenaen og organisert den på ein måte som gjer det meir tydeleg at den har fem seksjonar. Me har også fått inn nye kabeltromlar, nye steinar og nytt tømmer. No er banen garantert den beste i Noreg, og ein av dei beste banane eg har sykla på, seier Ulltang.

Tredje året på rad

Noregsmeisterskapen vert arrangert i Kvam for tredje året på rad.

– Årsaka er at Hardanger sykkelklubb har lyst til å arrangera dette og at me har erfaring med å gjennomføra slike tevlingar. Dessutan er det mange aktive trialsyklistar i Kvam. 12 av dei 28 påmelde representerer Hardanger sykkelklubb, fortel Ulltang.

Ulltang trur at det at klubben arrangerte noregsmeisterskapen for første gong for to år sidan, er ei av årsakene til at så mange i Kvam driv med trialsykling.

– Den første noregsmeisterskapen gjorde at fleire som hadde drive med trial tidlegare, byrja att, samstundes som me klarte å rekruttera nye syklistar, seier han.

Artikkelen held fram under annonsen.

Håpar på godt vêr

Dei som tykkjer trialsykling er spanande, har ikkje berre ein noregsmeisterskap å gle seg til denne helga. Det heile startar med noregscup fredag, før noregsmeisterskapen går av stabelen laurdag.

Ulltang fortel at publikumsframmøtet plar vera vêravhengig.

– For to år sidan var det fint vêr. Då stod det fullt av folk rundt arenaen. I fjor var ikkje vêret like fint. Då kom det færre. Me håpar på opphaldsvêr og at det kjem litt folk denne gongen, seier han.

Sjå video frå trialbanen på heimesida til HF.