Kvemmingane seier ja til Jondal

Klart fleire kvemmingar er for at Kvam herad skal slå seg saman med Jondal enn mot syner resultatet av innbyggjarundersøkinga.

56 prosent er for at Kvam herad skal slå seg saman med Jondal kommune, medan 25 prosent er mot, skriv Kvam herad på nettsida si. 19 prosent har svart at dei ikkje veit. 
Blant dei som er 30 år og eldre er det eit fleirtal for samanslåing, medan 42 prosent er mot samanslåing i aldersgruppa 16–29 år. I denne aldersgruppa er 31 prosent for samanslåing, medan heile 27 prosent har svart at dei ikkje veit. 
Kvemmingane er meir skeptiske til å slå seg saman med Granvin. 41 prosent er for og 44 prosent er mot at kommunen slår seg saman med kommunen i nord. 15 prosent har svart at dei ikkje veit, skriv Kvam herad. 
Flest er skeptiske til å slå seg saman med Granvin i aldersgruppa 16-29 år der 50 prosent seier nei, og blant dei over 60 år der 47 prosent seier nei. 
Opinion AS har gjennomført innbyggjarundersøkinga på vegner av Kvam herad, og har invervjua eit representativt utval på 600 personar blant dei over 16 år, skriv kommunen.