Meiner tilkomsten til tusenårsstaden bør betrast

I møtet i hovudutval for teknisk, næring og kultur måndag bad utvalsleiar Magnar Sollesnes (Sp) om at tilkomsten til tusenårsstaden på Hereiane vert betra. Ifølgje Sollesnes er det umogleg for eldre og funksjonshemma å komma seg dit i dag.

Sp-politikaren viste til at staden er mykje nytta til bryllaup, dåp, gudstenester og andre arrangement. Han spurde om det er mogleg å få ein grusveg eller å leggja ein treplatting frå avkøyrsla og ned til tusenårsstaden.

Assisterande rådmann Ragnvald Joakimsen sa at saka kan takast opp i samband med arbeidet med budsjettet for 2017.