Tre tjuveri i Kvam

Natt til onsdag var det innbrot i ei verksemd i andre etasje i Kvam fruktlager i Øystese. Gjerningsmennene stal eit kontantbeløp frå eit pengeskrin og eit bankkort, opplyser politioverbetjent i Kvam og Samnanger lensmannsdistrikt, Andor Helgheim.

Tjuvane har teke seg inn gjennom eit vindauge som stod på gløtt.

Onsdag undersøkte politiet eit tjuveri frå ein verkstad i Ytre Ålvik. Nokon har stole ein vinkelslipar frå verkstaden. Det er uvisst når tjuveriet har funne stad, men det har skjedd ein gong dei siste ti dagane. Politiet er utan spor i saka, seier Helgheim.

Den same dagen vart det meldt om eit tjuveri frå ein firmabil på Gartveit i Øystese natt til 19. april. Det vart stole ein batteridrill. Ifølgje Helgheim har ikkje politiet spor i saka.

Politiet ønskjer tips i alle sakene dersom nokon har observert noko som kan ha samanheng med tjuveria.