Skiskyttar Erling Aalvik frå Kvam langrenn- og skiskyttarklubb vart tysdag nummer 49 i normalprogrammet i verdsmeisterskapen for juniorar. Han lukkast ikkje med skytinga i Kontiolathi, og fekk til saman åtte strafferundar.

Torsdag skal tilsetjingsutvalet intervjua fire av dei som har søkt på rådmannsstillinga i Kvam herad. Den fyrste intervjurunden vart gjennomførd førre veke, opplyser ordførar Asbjørn Tolo (H), som er med i utvalet.

Politisk rådgjevar Sigrid Brattabø Handegard (Sp) i Samferdsledepartementet er tilsett som landsbylos i Jondal. Samstundes med tilsetjinga fekk Brattabø Handegard permisjon frå den nye jobben til 1. januar i 2014. Noverande landsbylos, Ingunn Stana, har fått tilbod om å vikariera.

I ein artikkel om "gjeltelivegen" på Kvamskogen i HF i dag kan det sjå ut som om Bjarne Mo (H) er medlem i formannskapet. Det er han ikkje. Ordførar Asbjørn Tolo representerer H i formannnskapet. Men partiet H endra syn på saka mellom formannskapsmøtet og heradsstyremøtet, slik det går fram av artikkelen.

I ettermiddag skal Hardangerrådet drøfta turistvegprosjekta ved tre fossar i Hardanger i heradshuset i Granvin. Saka skal drøftast igjen av fylkesutvalet 22. februar, etter at ho vart utsett i førre møte.
Dagleg leiar Leiv Vambheim i Hardangerrådet skriv i sakspapira at ”det er lett å oppfatta dette som ein søknad om midlar frå Hardanger. Det er å snu dette opp-ned.” Han viser til at førespurnaden om finansiering av prosjekta vart retta frå Statens vegvesen til fylkeskommunen, som deretter vende seg til Hardangerrådet og kommunane for å drøfta eit spleiselag.
– Rådet og fossekommunane svarar på invitasjonen frå fylkeskommunen. Hardanger kjem ikkje og bed fylkeskommunen om pengar, skriv Vambheim.
Ruth Grung (Ap), som stod bak utsetjingsforslaget i fylkesutvalet, meiner mellom anna at effekten for reiselivet bør vurderast nærare. Ho meiner dessutan at det er Nordhordlands tur til å få pengar frå konsesjonskraftpotten.
Vambheim påpeikar at ein eventuell lovnad om fire millionar til fosseprosjekta årleg i ti år kan medføra at Hardanger ikkje får meir pengar frå potten i perioden.

Skiskyttar Erling Aalvik frå Ålvik er teken ut til verdsmeisterskapen i skiskyting for juniorar i Kontiolahti i Finland 20.– 26. februar. Han vann både sprint og normalprogram i eit renn i Orkdal sist helg.

Ein mann vart i natt varetektsfengsla i Øystese etter å ha slege sambuaren sin. Ifølgje politiet skal hendinga ha skjedd på hotellet rett før midnatt. Mannen var rusa.

Åtte menn står på lista over søkjarar til rådmannsstillinga i Kvam. Desse er konstituert rådmann Arild McClellan Steine (38, biletet), rådmann Ørjan Raknes Forthun (43) i Eid, rådmann Harry Bjørnestad (61) i Lardal, rådmann Martin W. Kulild (48) i Gulen, assisterande rådmann Øyvind Haga (53) i Fusa, spesialrådgjevar Rune Heradstveit (46) i Beerenberg corp., dagleg leiar Olve Johan Fossedal (58) i Bedriftsressurs AS og resepsjonist Ramis Saihutdinov (24) ved Strand hotell. Éin søkjar har trekt seg før lista vart offentleg.

Overlege Stein Husebø føreles om verde ved livets slutt i Kvam senioruniversitet tysdag.
– Me har teke livet av døden. For hundre år sidan døydde mest alle nordmenn heime. I dag døyr fleire enn 80 prosent av oss på institusjon. På den måten kan me gå glipp av uerstattlege verdiar. Livet bør tilretteleggjast slik at livets siste levetid, finalen, er livet høgdepunkt. Våre røynsler viser at det er mogeleg, seier Husebø ifølgje ei pressemelding frå arrangøren.
Husebø er leiar ved Verdigheitssenteret.

Les meir i HF i dag.

Les meir i HF i dag.

Ein bilførar køyrde av vegen i Øystese litt etter midnatt natt til sundag. Føraren er mistenkt for køyring i påverka tilstand, opplyser operasjonsleiar Preben Wallestad i Hordaland politidistrikt.

Som HF skriv i papiravisa i dag, har fylkesutvalet i Hordaland utsett debatten om ei løyving på 40 millionar kroner til turistvegprosjekta ved fossane i Hardanger. Då Tolo vart merksam på det, valde han å ta opp fossesaka som ekstrasak i heradsstyremøtet komande tysdag. Han tilrår politikarane å henta pengar i disposisjonsfondet til å betala Kvam herads del av spleiselaget.
Bakgrunnen for hastverket er ifølgje Tolo at det er ein ”klar føremon” at både Hardangerrådet og dei råka kommunane har godkjent finansieringa før fylkespolitikarane drøftar saka. Fylkesutvalet prøver å avgjera henne igjen 22. februar.
– Eit nytt vedtak vil styrkja saka, skriv Tolo.
Ruth Grung (Ap) i fylkesutvalet seier til HF at ho meiner fylkesrådmannen har levert ei dårleg saksutgreiing. Ho saknar mellom anna ei vurdering av kva effekt pengebruken vil ha for reiselivet.
Ifølgje sakspapira til heradsstyret vil saka lyfta reiselivet og omdømmet i Hardanger.
Kvam herad har tidlegare dekt kostnaden med innløysing av eit bustadhus ved Steinsdalsfossen.

HF har i dag på trykk eit dikt underteikna "nabokjerringa". Som følgje av ein teknisk glipp er e-postadressa til ein av dei mannlege bladfykane oppførd under signaturen. Adressa høyrer til artikkelen som står over diktet. Me kan forsikra om at ingen av mennene i redaksjonen opptrer som anonyme og poetiske kjerringar, og bed om orsaking for blunderen.

Sjølv om regnet har ausa ned i låglandet den siste tida, kan Sjusete skisenter by på flotte skiløyper. Det fortel Ingmar Ølmheim i styret for skisenteret. Mykje av nedbøren som kjem som regn ved fjorden, kjem i form av snø på Sjusete. Ikkje minst i den delen av løypenettet som ligg høgast, ved Alkleiv, er tilhøva gode. I området ved skistova låg det i helga om lag førti centimeter snø. Nyttårsaftan tok mange turen til skisenteret.
Ølmheim fortel at prisen for årskort er auka frå 500 til 750 kroner i år. Han seier skisenteret treng kvar krone for å kunna gje skiinteresserte eit godt tilbod. Løypene vert køyrde kvar dag så sant det er trong for det. Nytt av året er at det er mogeleg å kjøpa seg parkerings- og løypekort i sportsforretninga Mo sport AS i Norheimsund. Tidlegare var ein nøydd til å henta kortet i skistova på Sjusete. Det kan ein framleis, men ulempa er at det ikkje alltid er folk der til å ta seg av kundane, fortel Ølmheim.

HF ynskjer alle lesarar eit svært godt nytt år med eit bilete teke på Sjusete ikkje mange dagar før storm og kraftig regnvêr sette inn i romjula.